Fatime Ahmeti

Fatime Rr. (Musliu) Ahmeti u lind në Marec, më 2 gusht 1947. Shkruan poezi për fëmijë dhe të rritur. Është marrë edhe me mbledhjen e folklorit. Është anëtare e Lidhjes së Shkrimtarëve të Republikës së Kosovës dhe jeton në Prishtinë.

Librat e botuara: 

“Ishuj e brigje”, “Rilindja”, Prishtinë, 2001,

“Bekimi i virgjër”, SHSHK “Anton Pashku, Prishtinë, 2004,

“Unaza e lindjes”, SHSHK “Anton Pashku”, Prishtinë, 2008

 

ENGJËLLI I ULPIANËS

Të gdhendur në gur
e me xixa nuri
nga qielli i shekujve
mes epokave
Flori e Lauri
Në Ulpianë e në Justinianë
Flori e Lauri

përsëri kthehen në mur
me shenjtërinë e tyre ilire
për t’i shkruar me penë
faqet e historisë së re dardane
që pikojnë purpur

Në Ulpianë
derdhen ngjyrat dardane

 

MUZA IME

Zgjohu nga ëndrra
muza ime 
në pëlhurë të shiut
vargun qëndise

Mbi letër
e shoh vetveten
dhe fytyrën e Eurodikës
që aq shumë ngjanë në mua

Muza ime
pse heshtë
brenda baladës së pashkruar

 

POETIT

- Ali Podrimjes-

Deri më sot
asnjë fytyrë e poetit
të vdekur
nuk më shfaqet
çuditërisht

Në letrën time
edhe pse nuk kam hequr dorë
nga mendimet e trishta

Unë e di se vetëm njerëzit
lindin dhe vdesin një herë

E ti 
o miku im poet
sillesh vërdallë
rreth botës
e parakalon nga koha në kohë
me penën e shastisur
në adresën e Lum Lumit

 

EMBLEMATIKA E DIELLIT

Pothuajse çdo natë
shfletoj ditarin tim
kur më zë malli
ta kujtoj
rininë e ardhur
nga vetë nusëria

Duke e kërkuar
emblemën e Diellit
në adresë të vazhdimësisë
flaka shikimin

Krijova më shumë vargje
para se Dielli 
të dashurohet në mua

 

NË PERËNDIM LIND DIELLI IM

Historia ime 
po luhatet në udhëkryq 
atje ku kapen fajet e ligësisë

Në kërkim të vetvetes
kurrë nuk jam mposhtë nga ligësia
sepse asnjëherë
nuk e kam dashtë lindjen 
e as anën e majtë të tradhëtisë

Në të djathtën
e udhës sime
jam takuar me shekujt
dhe n’udhëtim kah perëndimi
kam takuar Diellin tim

 

ENIGMA E PAZGJIDHUR

Enigma e pazgjidhur
shkon përtej harrimit

Le të mallkojë bota
enigmën e harrimit
a të kujtimit
që rri varë mbi urë

Pranë meje nuk dua 
të jesh enigmë
e goditur nga rrufeja e gurit